Izaskun Lasa billabonarrak, Ekain Sardon hernaniarrak eta Mikel Arrizabalaga donostiarrak Nepalera egindako bidaia batek irabazi du Berria egunkariaren Bidaia eta Mendi Kroniken Lehiaketa. Horri esker, hiru mendizaleek Cervino Itzulia (Alpeetan) egiteko aukera izango dute Mendiak eta Herriak mendi gidariak elkarteari esker.

Emakumeek kirolean duten presentzia bermatu eta kirola egitera bultzatzeko, Emakumea eta kirola. Etengabeko lehia hitzaldia antolatu du Zumaiako Udaleko Berdintasun Sailak. Ostegunean, urtarrilaren 12an, izango da hitzaldia, 18:30ean herriko Alondegian. Dorleta Ugalde, Eusko Jaurlaritzako kirol teknikaria izango da hizlaria eta besteak bestea, kirolean genero ikuspegi txertatzearen beharraz ariko da.

Azken urteetan kirolariei arlo psikologikoan laguntzeko hainbat ekintza gauzatzen ari dira. Laster beste baliabide bat izango dute kirolariek, izan ere, Kirolarientzat prestakuntza psikologikoa tailerra izango da otsailetik maiatzera. Parte hartu nahi dutenek dagoeneko zabalik dute izen-emate epea, otsailaren 1a, arte. Hiru bloketan egingo dute tailerra, beraz, horietako bakarrean edo hiruetan har daiteke parte.

Gipuzkoako Foru Aldundiak eta Donostiako Euskararen Udal Patronatuak antolatutako Kirol eta Aisialdiko Esatarientzako Ikastaroko izen-emate epea astelehenean, abenduak 26, amaituko da. Kirol eta aisialdi ekitaldietarako aurkezle euskaldunak prestatzeko teknikak eta baliabideak eskainiko dituzte ikastaroan. 2012ko urtarrilaren 14tik martxoaren 24ra izango da Mintzola Fundazioaren egoitzan, Villabonan.

Gipuzkoako Foru Aldundiak eta Donostiako Euskararen Udal Patronatuak datorren urtean ere antolatuko dute Kirol eta aisialdiko esatarientzako ikastaroa. Kirol eta aisialdi ekitaldietarako aurkezle euskaldunak prestatzeko teknikak eta baliabideak eskainiko dituzte ikastaroan. Izen-ematea abenduaren 5etik 26ra egongo da zabalik eta ikastaroa 2012ko urtarrilaren 14tik martxoaren 24ra izango da Mintzola Fundazioaren egoitzan, Villabonan.

• Ikastaroan izena eman

Gipuzkoako Foru Aldundiak Luis Mari Zulaika Jarduera Fisikoaren eta Kirolaren Zientzietako irakasleak idatzitako Tostako arrauna, irakaskuntzarako baliabideak liburua argitaratu du. Arraunaren arlo teorikoa zein praktikoa lantzen ditu lanak, besteak beste, ariketak proposatuz. Liburua arraun elkarteetan banatuko dute eta abenduaren egindako Durangoko Azokan egon zen salgai.

Arrasateko hamar kirol klubek Arrasate Euskaldun Dezagun (AED) elkartearen deiari erantzun diote eta euskararen erabilera indartzeko lanean aritzeko asmoa agertu dute. AEDk 30 klubi luzatu zien deia eta horietako hamar elkartu dira. Bilkuran bakoitzak bere taldeko egoera azaldu du eta gazteek gaztelaniarako joera handia dutela ondorioztatu dute.

Hilabetez informazioa behin-behineko webgunean ematen aritu ostean, Donostiako Euskararen Udal Patronatuak Mugikirola! webgunearen behin betiko bertsioa jarri du martxan. Orain arteko atalei, hau da, Albisteak eta Lehiaketari Agenda, Paperekoa, Blogak eta Estekak gehitu dizkiete.

Eusko Jaurlaritzako Hizkuntza Politikarako Sailburuordetzak euskararen aldeko pilota partida antolatu du ostiralerako Donostiako Atano III. pilotalekuan. Hurrengo egunean, abenduak 3, ospatzen den Euskararen Nazioarteko Egunaren harira antolatu du Jaurlaritzak kirol ekitaldi hau. Sarrera doan izango da eta ahalik eta euskaltzale kopuru handiena biltzea izango du helburu.

KirolPsikologia egitasmoak III. KirolPsikologia Aholkularitza Psikologiko Beka antolatu du. Aurten, lehen aldiz, kirolari eta entrenatzaile banari ez ezik, epaile bati emango diote beka. Epailearena estimulu askoren artean erabakiak hartu beharreko lana dela eta ez zaiola behar adinako arretarik jartzen azaldu dute KirolPsikologiako arduradunek.